ವಿಜ್ಞಾನ ಸಂವಹನ ಚಟುವಟಿಕೆಗಳ ದೃಷ್ಟಿಯಿಂದ ೨೦೨೩ ಬಹಳವೇ ಖುಷಿಕೊಟ್ಟ ವರ್ಷ. ನನ್ನಂತಹ ಅನೇಕರಿಗೆ ಮಾರ್ಗದರ್ಶಕರಾಗಿದ್ದ ಅಡ್ಯನಡ್ಕ ಕೃಷ್ಣಭಟ್ ಅವರ ಪ್ರಾತಿನಿಧಿಕ ಬರಹಗಳ ಸಂಕಲನ ಲೋಕಾರ್ಪಣೆಯಾಗಿದ್ದು ಹಾಗೂ ಶ್ರೀಮಂಗಲದ ನೆನಪುಗಳ 'ನೂರೊಂದು ನೆನಪು ನ್ಯೂರಾನಿನಿಂದ' ಪ್ರಕಟವಾಗಿದ್ದು ನನ್ನ ದೃಷ್ಟಿಯಿಂದ ಈ ವರ್ಷದ ಪ್ರಮುಖಾಂಶಗಳು. ಜನವರಿಯಲ್ಲಿ ಭೋಪಾಲದಲ್ಲಿ ನಡೆದ ಅಂತಾರಾಷ್ಟ್ರೀಯ ವಿಜ್ಞಾನ ಹಬ್ಬದಲ್ಲಿ ಹಲವು ಕನ್ನಡದ ಕೆಲಸಗಳಿಗೆ ಸಾಕ್ಷಿಯಾಗಿದ್ದು, ನಾನೂ ವಿಷಯಮಂಡನೆ ಮಾಡಿದ್ದು ಸುಮಧುರ ನೆನಪು. ಕೊಳ್ಳೇಗಾಲ ಶರ್ಮ ಅವರ 'ತಳಿ-ಉಳಿ' ಕೃತಿಯ ಸಂಪಾದಕನೆನ್ನಿಸಿಕೊಂಡಿದ್ದು, ಡಾ. ಎ. ಸತ್ಯನಾರಾಯಣರೊಡನೆ ಸೇರಿ ಸಿದ್ಧಪಡಿಸಿದ 'ಡಿಜಿಟಲ್ ಕನ್ನಡ ಕೌಶಲ' ಪಠ್ಯಪುಸ್ತಕ ಬೆಂಗಳೂರು ವಿವಿಯಿಂದ ಪ್ರಕಟವಾಗಿದ್ದು ಬೋನಸ್.

ವಿಜಯ ಕರ್ನಾಟಕದ 'ಟೆಕ್ ನೋಟ' ಅಂಕಣ ಮುಂದುವರಿದದ್ದು ಮಾತ್ರವಲ್ಲದೆ ಹೊಸಬಗೆಯ ಬರಹಗಳನ್ನು ಪ್ರಯತ್ನಿಸುವುದಕ್ಕೆ ಅವಕಾಶವನ್ನೂ ಕೊಟ್ಟಿತು. ಬೆಂಗಳೂರು, ಮೈಸೂರು, ಕೈಗಾ, ಹಂಪೆ, ಹಗರಿಬೊಮ್ಮನಹಳ್ಳಿ ಸೇರಿದಂತೆ ರಾಜ್ಯದ ಹಲವೆಡೆ ವಿಜ್ಞಾನ ಸಂವಹನಕ್ಕೆ ಸಂಬಂಧಿಸಿದ ಕಾರ್ಯಕ್ರಮಗಳಲ್ಲಿ ಪಾಲ್ಗೊಳ್ಳುವುದು ಕೂಡ ಈ ವರ್ಷ ಸಾಧ್ಯವಾಯಿತು. ಬೆಂಗಳೂರಿನ ಭಾರತೀಯ ವಿಜ್ಞಾನ ಮಂದಿರದಲ್ಲಿ ಸಂವಾದ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಿದ್ದು, ನನ್ನ ಪುಸ್ತಕ ಓದಿಕೊಂಡು ಸಿದ್ಧರಾಗಿ ಬಂದಿದ್ದ ಮಕ್ಕಳೊಡನೆ ಮೈಸೂರಿನ ಎಸ್‌ವಿವೈಎಂ‌ನಲ್ಲಿ ಮಾತನಾಡಿದ್ದು ವಿಶೇಷ. ಈ ಹಿಂದೆ ಪ್ರಕಟವಾಗಿದ್ದ 'ಪುಟ್ಟ ಪುಟ್ಟಿಯ ಪರಿಸರ ಪಾಠಗಳು' ಕೃತಿಗಾಗಿ ಕರ್ನಾಟಕ ಬಾಲವಿಕಾಸ ಅಕಾಡೆಮಿಯ ಪುರಸ್ಕಾರ ಕೈಸೇರಿದ್ದೂ ಇದೇ ವರ್ಷ. ಕನ್ನಡದ ಹಲವು ವಿಜ್ಞಾನ ಸಂವಹನ ಕಾರ್ಯಕ್ರಮಗಳಿಗೆ ಬೆಂಬಲವಾಗಿದ್ದ ವಿಜ್ಞಾನ್ ಪ್ರಸಾರ್ ಸಂಸ್ಥೆ ಈ ವರ್ಷ ಮುಚ್ಚಿಹೋದದ್ದು ಬೇಸರದ ಸಂಗತಿಯಾದರೂ, ಆ ಸಂಸ್ಥೆಯ ಆಶ್ರಯದಲ್ಲಿ ಪ್ರಾರಂಭವಾಗಿದ್ದ 'ಕುತೂಹಲಿ' ಕನ್ನಡ ಜಾಲಪತ್ರಿಕೆಯ ಪ್ರಕಟಣೆ ಸ್ವತಂತ್ರವಾಗಿ ಮುಂದುವರಿದಿರುವುದು ಸಮಾಧಾನದ ಸಂಗತಿ.

ಜನವರಿ ಮೂರನೇ ವಾರ ಫರೀದಾಬಾದಿನಲ್ಲಿ ನಡೆಯಲಿರುವ ಅಂತಾರಾಷ್ಟ್ರೀಯ ವಿಜ್ಞಾನ ಹಬ್ಬದಲ್ಲಿ ಪಾಲ್ಗೊಳ್ಳುವ ಮೂಲಕ ೨೦೨೪ರ ಚಟುವಟಿಕೆಗಳು ಪ್ರಾರಂಭವಾಗಲಿವೆ. ಮುಂಬರುವ ವರ್ಷದಲ್ಲಿ ಇನ್ನೂ ಹೆಚ್ಚಿನದು ಸಾಧ್ಯವಾಗಲಿ, ಅದಕ್ಕೆ ನಿಮ್ಮ ಪ್ರೋತ್ಸಾಹವಿರಲಿ ಎನ್ನುವುದು ನನ್ನ ಆಶಯ. ನಿಮ್ಮೆಲ್ಲರಿಗೂ ಹೊಸವರ್ಷದ ಹಾರ್ದಿಕ ಶುಭಾಶಯಗಳು.

ಮಕ್ಕಳಿಗಾಗಿ ವಿನೂತನ ಕತೆಗಳನ್ನು ಪ್ರಕಟಿಸುವ ಮೂಲಕ ಹೆಸರುವಾಸಿಯಾಗಿರುವುದು ಪ್ರಥಮ್ ಬುಕ್ಸ್ ಸಂಸ್ಥೆ. ತನ್ನ ಬಹುತೇಕ ಪ್ರಕಟಣೆಗಳನ್ನು 'ಸ್ಟೋರಿವೀವರ್' ಆನ್‌ಲೈನ್ ವೇದಿಕೆಯ ಮೂಲಕ ಉಚಿತವಾಗಿ ನೀಡುತ್ತಿರುವ ಈ ಸಂಸ್ಥೆ, ಇದೀಗ ಅದೇ ವೇದಿಕೆಯನ್ನು ಬಳಸಿಕೊಂಡು ವಿನೂತನ ಸ್ಪರ್ಧೆಯೊಂದನ್ನು ಆಯೋಜಿಸಿದೆ. 

'ರೀಟೆಲ್, ರೀಮಿಕ್ಸ್, ರೀಜಾಯ್ಸ್ ೨೦೨೦' ಎಂಬ ಹೆಸರಿನ ಈ ಸ್ಪರ್ಧೆಯಲ್ಲಿ ಯಾರು ಬೇಕಾದರೂ ಭಾಗವಹಿಸಬಹುದು. ಕುತೂಹಲಕರ ಮಕ್ಕಳ ಕತೆಗಳನ್ನು ನಮ್ಮ ಭಾಷೆಗೆ ಅನುವಾದಿಸಬೇಕು ಎನ್ನುವುದು ಈ ಸ್ಪರ್ಧೆಯ ಹೂರಣ. ಈ ನಮೂನೆಯನ್ನು (https://bit.ly/RRR_Contest) ತುಂಬಿಸಿ, ನಮ್ಮ ಆಯ್ಕೆಯ ಭಾಷೆಯನ್ನು ತಿಳಿಸಿದರೆ ನಾವು ಅನುವಾದಿಸಬೇಕಾದ ಕತೆಯನ್ನು ಪ್ರಥಮ್ ಬುಕ್ಸ್ ಸೂಚಿಸಲಿದೆ. ಒಂದಕ್ಕಿಂತ ಹೆಚ್ಚು ಕತೆಗಳನ್ನು ಒಂದಕ್ಕಿಂತ ಹೆಚ್ಚು ಭಾಷೆಗಳಿಗೆ ಅನುವಾದಿಸುವ ಅವಕಾಶವೂ ಇದೆ.

ನೋಂದಾಯಿಸಿಕೊಳ್ಳಲು ಮತ್ತು ಈ ಸ್ಪರ್ಧೆಯಲ್ಲಿ ಭಾಗವಹಿಸಲು ಮೇ ೨೦, ೨೦೨೦ರವರೆಗೆ ಸಮಯಾವಕಾಶ ಇದೆ. ನಾವು ಮಾಡಿದ ಅನುವಾದವನ್ನೇ ಈ ಸ್ಪರ್ಧೆಗೆ ಸಲ್ಲಿಸಬೇಕು. ಅತ್ಯುತ್ತಮವಾಗಿ ಅನುವಾದಿಸಿದವರಿಗೆ ಪ್ರಥಮ್ ಬುಕ್ಸ್ ಪರಿಣತರಿಂದ ಹೆಚ್ಚಿನ ತರಬೇತಿ ಹಾಗೂ ತಾವು ಅನುವಾದಿಸಿದ ಪುಸ್ತಕದ ಮುದ್ರಿತ ಪ್ರತಿ ದೊರಕಲಿದೆ.

ಈ ಸ್ಪರ್ಧೆಯ ಅಂಗವಾಗಿ ಸಿದ್ಧವಾಗುವ ಎಲ್ಲ ಅನುವಾದಗಳನ್ನೂ ಸ್ಟೋರಿವೀವರ್ ವೇದಿಕೆಯಲ್ಲಿ CC BY 4.0 ಮುಕ್ತ ಪರವಾನಗಿಯಡಿ ಪ್ರಕಟಿಸಲಾಗುವುದು.


ಹೆಚ್ಚಿನ ವಿವರಗಳಿಗೆ ಈ ಕೊಂಡಿಗಳ ಮೇಲೆ ಕ್ಲಿಕ್ ಮಾಡಿ:
ಸ್ಪರ್ಧೆಯ ವಿವರಗಳು: https://bit.ly/RRR2020_Blog
ನೋಂದಣಿ ನಮೂನೆ:  https://bit.ly/RRR_Contest
ಸ್ಟೋರಿವೀವರ್: https://storyweaver.org.in/

ಕೆಲವು ದಿನಗಳ ಹಿಂದೆ ಮಗಳ ಸುಕನ್ಯಾ ಸಮೃದ್ಧಿ ಖಾತೆಗೆ ಹಣ ಹಾಕಲು ಬ್ಯಾಂಕಿಗೆ ಹೋಗಿದ್ದೆ. ಆನ್‌ಲೈನ್ ಟ್ರಾನ್ಸ್‌ಫರ್ ಮಾಡುವಂತಿಲ್ಲ ಎಂದಿದ್ದ ಕಾರಣ ಚೆಕ್ ತೆಗೆದುಕೊಂಡು ಹೋದೆ. ನನ್ನ ಕೈಯಲ್ಲಿ ಬೇರೆ ಬ್ಯಾಂಕಿನ ಚೆಕ್ ನೋಡಿದ ತಕ್ಷಣ ಕೌಂಟರಿನಲ್ಲಿದ್ದ ಅಧಿಕಾರಿ "ನಮ್ಮ ಬ್ಯಾಂಕಿನ ಚೆಕ್ ಇಲ್ಲದಿದ್ದರೆ ಖಾತೆಗೆ ಹಣ ಹಾಕುವಂತಿಲ್ಲ" ಎಂದರು. ಮೂರ್ನಾಲ್ಕು ವರ್ಷಗಳಿಂದ ಇಲ್ಲದ ಈ ನಿಯಮ ಈಗೇಕೆ ಎನ್ನುವುದಕ್ಕೆ ಅವರು ಸರಿಯಾಗಿ ಉತ್ತರಿಸದೆ ನಮ್ಮಲ್ಲೇ ಒಂದು ಅಕೌಂಟು ತೆರೆದು ಆಮೇಲೆ ಹಣ ಹಾಕಿ ಎಂದುಬಿಟ್ಟರು.

ಉಪಯೋಗಿಸುವುದಿಲ್ಲ ಎಂದು ಗೊತ್ತಿದ್ದೂ ಇನ್ನೊಂದು ಅಕೌಂಟನ್ನು ತೆರೆಯುವುದು ಸಮಯ-ಶ್ರಮ ಎರಡೂ ವ್ಯರ್ಥಮಾಡಿದ ಹಾಗೆ ಎಂದು ಅವರಿಗೆ ವಿವರಿಸಲು ಪ್ರಯತ್ನಿಸಿದ್ದು ವಿಫಲವಾದಮೇಲೆ ಆ ಶಾಖೆಯ ಹಿರಿಯ ಅಧಿಕಾರಿಯ ಹತ್ತಿರ ಹೋದೆ. ಅವರು ಸಮಾಧಾನ ಹಾಗೂ ಸೌಜನ್ಯದಿಂದಲೇ ಮಾತನಾಡಿದರೂ "ಸಿಸ್ಟಂ ಪ್ರಾಬ್ಲಂ" ಎಂದು ಹೇಳಿ ಚೆಕ್ ತೆಗೆದುಕೊಳ್ಳಲು ಒಪ್ಪಲಿಲ್ಲ. ಆ ವೇಳೆಗಾಗಲೇ ಸಾಕಷ್ಟು ಕಿರಿಕಿರಿಯಾಗಿದ್ದರಿಂದ ಹೊಸ ಖಾತೆ ತೆರೆಯಲು, ಅದರ ಮೂಲಕ ಮಗಳ ಖಾತೆಗೆ ಹಣ ಹಾಕಲು ನಾನೂ ಸಿದ್ಧನಿರಲಿಲ್ಲ.

ಬ್ಯಾಂಕಿಂಗ್ ವ್ಯವಹಾರ ಸುಲಭಗೊಳಿಸಲು ಹಲವು ಕಸರತ್ತುಗಳು ನಡೆಯುತ್ತಿರುವ ಈ ಸಂದರ್ಭದಲ್ಲಿ ವರ್ಷಕ್ಕೆ ಒಮ್ಮೆ ಮಾತ್ರ ಹಣ ಹಾಕಲು ಹೊಸ ಖಾತೆ ತೆರೆಯಬೇಕೆನ್ನುವುದು ತಪ್ಪು ಎನ್ನುವುದು ನನ್ನ ವಾದವಾಗಿತ್ತು. ಇದು ಸರಿಯೋ ತಪ್ಪೋ ತಿಳಿಯಲು ಏನು ಮಾಡಬಹುದು ಎಂದು ಯೋಚಿಸಿದಾಗ ನನ್ನ ಮನಸ್ಸಿಗೆ ಬಂದಿದ್ದು ಕೇಂದ್ರ ಸರಕಾರದ Centralized Public Grievance Redress And Monitoring System (CPGRAMS) - ಸಾರ್ವಜನಿಕರ ಸಮಸ್ಯೆಗಳನ್ನು ಅಂತರಜಾಲದ ಮೂಲಕ ಸಂಬಂಧಪಟ್ಟವರ ಗಮನಕ್ಕೆ ತರುವ ವ್ಯವಸ್ಥೆ.

ಹಿಂದೆ ಯಾವಾಗಲೂ ಈ ವ್ಯವಸ್ಥೆ ಬಳಸಿರಲಿಲ್ಲವಾದ್ದರಿಂದ ಮೊದಲಿಗೆ ಇದರ ಜಾಲತಾಣದಲ್ಲಿ (pgportal.gov.in) ಒಂದು ಖಾತೆ ತೆರೆದೆ. ವೈಯಕ್ತಿಕ ವಿವರಗಳನ್ನು (ವಿಳಾಸ, ದೂರವಾಣಿ ಹಾಗೂ ಇಮೇಲ್) ಕೊಟ್ಟ ನಂತರ ದೂರು ಯಾವ ವಿಷಯಕ್ಕೆ ಸಂಬಂಧಿಸಿದ್ದು ಎಂದು ದಾಖಲಿಸಬೇಕಿತ್ತು. ಸೂಕ್ತ ವಿಭಾಗವನ್ನು (Central Government > Financial Services - Banking Division) ಆರಿಸಿ ವಿವರಗಳನ್ನು ಬರೆದ ತಕ್ಷಣವೇ ನನ್ನ ದೂರು ದಾಖಲಾಗಿ ಅದಕ್ಕೆ ಇಮೇಲ್ ಹಾಗೂ ಎಸ್ಸೆಮ್ಮೆಸ್ ಮೂಲಕ ಸ್ವೀಕೃತಿಯೂ ಬಂತು.

ಬ್ಯಾಂಕಿನವರು ಹೇಳುತ್ತಿರುವುದು ಸರಿಯೇ ಎಂದು ತಿಳಿಸಿ, ಹಾಗೊಮ್ಮೆ ಸರಿಯಿಲ್ಲದಿದ್ದರೆ ಅವರಿಗೆ ನನ್ನ ಚೆಕ್ ಸ್ವೀಕರಿಸಲು ಹೇಳಿ - ಇದು ನನ್ನ ದೂರಿನ ಸಾರಾಂಶ. ಶನಿವಾರ ಸಂಜೆಯ ವೇಳೆಗೆ ದೂರು ದಾಖಲಿಸಿದ ನಾನು ಅದರ ಬಗ್ಗೆ ಹೆಚ್ಚಿನ ನಿರೀಕ್ಷೆಯನ್ನೇನೂ ಇಟ್ಟುಕೊಳ್ಳದೆ ಪರ್ಯಾಯ ಆಯ್ಕೆಗಳ ಬಗ್ಗೆಯೂ ಯೋಚಿಸಲು ಶುರುಮಾಡಿದ್ದೆ. ಆ ಬ್ಯಾಂಕಿನ ಫೇಸ್‌ಬುಕ್ ಪುಟದಿಂದ "We will forward your concern with the relevant team" ಎನ್ನುವುದಕ್ಕಿಂತ ಹೆಚ್ಚಿನ ಸಹಾಯ ಸಿಗಲಿಲ್ಲ.

ಈ ಪ್ರಕರಣಕ್ಕೆ ಅನಿರೀಕ್ಷಿತ ತಿರುವು ಸಿಕ್ಕಿದ್ದು ಸೋಮವಾರ. ಮಧ್ಯಾಹ್ನ ಮೀಟಿಂಗಿನಲ್ಲಿದ್ದಾಗ ಯಾವುದೋ ಲ್ಯಾಂಡ್‌ಲೈನ್ ಸಂಖ್ಯೆಯಿಂದ ಒಂದೇ ಸಮನೆ ಕರೆಗಳು ಬರಲು ಪ್ರಾರಂಭವಾಯಿತು. ಮೀಟಿಂಗಿನಿಂದ ಹೊರಬಂದು ಆ ಕರೆಗೆ ಉತ್ತರಿಸಿದಾಗ ಮಾತನಾಡಿದವರು ಶನಿವಾರ ಭೇಟಿಮಾಡಿದ್ದ ಬ್ಯಾಂಕಿನ ಅದೇ ಹಿರಿಯ ಅಧಿಕಾರಿ. ನಿಮ್ಮ ದೂರು ಸಿಕ್ಕಿದೆ, ನಿಮ್ಮ ಸಮಸ್ಯೆ ಬಗೆಹರಿಸಲು ಒಂದು ಮಾರ್ಗ ಹುಡುಕಿದ್ದೇವೆ, ನಾಳೆ ಚೆಕ್ ತನ್ನಿ, ಖಾತೆಗೆ ಹಾಕೋಣ ಎಂದ ಅವರ ಮಾತು ಕೇಳಿ ನನಗೆ ಒಂದು ನಿಮಿಷ ಏನು ಹೇಳಬೇಕೆಂದೇ ತೋಚಲಿಲ್ಲ.

ಅವರ ಕರೆಗೆ ಧನ್ಯವಾದ ತಿಳಿಸಿ, ದೂರಿನ ಹಿಂದೆ ಇದ್ದ ನನ್ನ ಕಾಳಜಿಯನ್ನೂ ವಿವರಿಸಿದೆ. ಮಾರನೆಯ ದಿನ (ಮಂಗಳವಾರ) ಬ್ಯಾಂಕಿಗೆ ಹೋಗಿ ಅವರನ್ನು ಭೇಟಿಮಾಡಿದೆ. ಶನಿವಾರದ ಹಾಗೆಯೇ ಸೌಜನ್ಯದಿಂದ ವ್ಯವಹರಿಸಿದ ಅವರು ಚೆಕ್ ತೆಗೆದುಕೊಂಡು ಸ್ವೀಕೃತಿ ಕೊಟ್ಟರು. ಕೆಲವೇ ದಿನಗಳಲ್ಲಿ ಹಣವನ್ನು ಖಾತೆಗೆ ಜಮಾ ಮಾಡುವುದಾಗಿಯೂ ತಿಳಿಸಿದರು. ಅವರ ಸಹಾಯಕ್ಕೆ ಕೃತಜ್ಞತೆ ತಿಳಿಸಿದ ನಾನು ದೂರನ್ನು ಮುಕ್ತಾಯಗೊಳಿಸಬಹುದು ಎಂದು ಇಮೇಲ್ ಕಳುಹಿಸಿದೆ. ಬುಧವಾರ ಮಧ್ಯಾಹ್ನದ ವೇಳೆಗೆ ನನ್ನ ದೂರನ್ನು ಮುಕ್ತಾಯಗೊಳಿಸಿದ ಮಾಹಿತಿಯೂ ಎಸ್ಸೆಮ್ಮೆಸ್ ಮೂಲಕ ಬಂತು.

ನನ್ನ ಸಮಸ್ಯೆ ಸಣ್ಣದೇ ಇರಬಹುದು. ಆದರೆ ಅದನ್ನು ಹೇಗೆ ಬಗೆಹರಿಸಿಕೊಳ್ಳುವುದೆಂದು ತಿಳಿಯದ ಸಂದರ್ಭದಲ್ಲಿ CPGRAMS ವ್ಯವಸ್ಥೆ ನೀಡಿದ ನೆರವು ಅತ್ಯಂತ ಸಂತೋಷ ಹಾಗೂ ಆಶ್ಚರ್ಯಗಳನ್ನು ಮೂಡಿಸಿದ್ದಂತೂ ನಿಜ. ಕೇವಲ ಇಪ್ಪತ್ತನಾಲ್ಕು ಗಂಟೆಗಳ ಅವಧಿಯಲ್ಲಿ (ನಡುವೆ ಬಂದ ಭಾನುವಾರ ಹೊರತುಪಡಿಸಿ) ನಮ್ಮ ದೂರು ಕೇಂದ್ರ ಸರಕಾರದಿಂದ ಬ್ಯಾಂಕಿನ ವಿಭಾಗೀಯ ಕಚೇರಿಗೆ, ಅಲ್ಲಿಂದ ನಮ್ಮ ಶಾಖೆಗೆ ತಲುಪಿ ಪರಿಹಾರವನ್ನೂ ಪಡೆದುಕೊಳ್ಳುವುದೆಂದರೆ ಅದೇನು ತಮಾಷೆಯ ವಿಷಯವೇ? ಇಂಥದ್ದೊಂದು ಅದ್ಭುತ ವ್ಯವಸ್ಥೆಯನ್ನು ನಿರ್ವಹಿಸುತ್ತಿರುವ ಕೇಂದ್ರ ಸರಕಾರದ Ministry Of Personnel, Public Grievances & Pensionsನ ಸಚಿವರು ಹಾಗೂ ಅಧಿಕಾರಿಗಳು ನಿಜಕ್ಕೂ ಅಭಿನಂದನಾರ್ಹರು.

[CPGRAMS ವ್ಯವಸ್ಥೆ ಬಳಸಿದ ನನ್ನ ಅನುಭವವನ್ನು ಹಂಚಿಕೊಳ್ಳುವುದಷ್ಟೇ ಈ ಬರಹದ ಉದ್ದೇಶ. ಬ್ಯಾಂಕಿನ ಹಾಗೂ ಶಾಖೆಯ ಹೆಸರನ್ನು ಬರೆದಿಲ್ಲದಿರುವುದು ಉದ್ದೇಶಪೂರ್ವಕ. ಅವರಿಗೆ ತೊಂದರೆಯಾಗುವುದಾದರೆ ಮಗಳ ಖಾತೆಯನ್ನು ಬೇರೆ ಬ್ಯಾಂಕಿಗೆ ವರ್ಗಾಯಿಸಿಕೊಳ್ಳಲು ಸಿದ್ಧ ಎಂದು ಶಾಖೆಯ ಅಧಿಕಾರಿಗಳಿಗೆ ಈಗಾಗಲೇ ತಿಳಿಸಿದ್ದೇನೆ.]

ಬರವಣಿಗೆ ಕಷ್ಟ ಎಂದು ಅನೇಕರು ಹೇಳುತ್ತಾರೆ. ಮಕ್ಕಳಿಗಾಗಿ ಬರೆಯುವುದು ಇನ್ನೂ ಕಷ್ಟ. ಆದರೆ ಅವರಿಗಾಗಿ ಬರೆದಾಗ ಸಿಗುವ ಖುಷಿಯಿದೆಯಲ್ಲ, ಅದಕ್ಕೆ ಬೆಲೆಕಟ್ಟುವುದೂ ಕಷ್ಟ. ಅಂತಹ ಖುಷಿಯನ್ನು ನನಗೆ ಕೊಟ್ಟಿರುವುದು ಪ್ರಥಮ್ ಬುಕ್ಸ್ ಎಂಬ ಬೆಂಗಳೂರು ಮೂಲದ ಸ್ವಯಂಸೇವಾ ಸಂಸ್ಥೆ.

ಹಲವು ಭಾರತೀಯ ಭಾಷೆಗಳಲ್ಲಿ ಮಕ್ಕಳ ಪುಸ್ತಕಗಳನ್ನು ಪ್ರಕಟಿಸಿ ಅದನ್ನು ಮಕ್ಕಳಿಗೆ ತಲುಪಿಸುವುದು ಈ ಸಂಸ್ಥೆಯ ಕೆಲಸ. ಮುದ್ರಿತ ಪುಸ್ತಕಗಳ ಜೊತೆಗೆ ಡಿಜಿಟಲ್ ಪುಸ್ತಕಗಳ ಪ್ರಕಟಣೆಯಲ್ಲೂ ಪ್ರಥಮ್ ಬುಕ್ಸ್ ಸಕ್ರಿಯವಾಗಿದೆ. ಈ ಸಂಸ್ಥೆ ರೂಪಿಸಿರುವ 'ಸ್ಟೋರಿವೀವರ್' ಎಂಬ ಮುಕ್ತ ವೇದಿಕೆಯಲ್ಲಿರುವ ಕತೆಗಳನ್ನು ನಾವು ಬೇಕಾದಷ್ಟು ಓದಬಹುದು, ಅನುವಾದಿಸಬಹುದು, ಹೊಸ ಕತೆಗಳನ್ನು ಸೇರಿಸಲೂಬಹುದು. [ಸ್ಟೋರಿವೀವರ್ ಬಗ್ಗೆ ಹೆಚ್ಚಿನ ವಿವರಗಳಿಗೆ ಈ ಲೇಖನ ಓದಿ!]

ನನ್ನ ಕೆಲ ಅನುವಾದಗಳನ್ನು ಸ್ಟೋರಿವೀವರ್‌ನಲ್ಲಿ ಪ್ರಕಟಿಸುವ ಅವಕಾಶ ಕೊಟ್ಟಿದ್ದ ಪ್ರಥಮ್ ಬುಕ್ಸ್, ಇದೀಗ ಅವುಗಳಲ್ಲಿ ಕೆಲವನ್ನು ಮುದ್ರಿತ ರೂಪದಲ್ಲೂ ಹೊರತಂದಿದೆ. ಡಿಜಿಟಲ್ ಜಗತ್ತಿನ ಮೂಲಭೂತ ಪರಿಕಲ್ಪನೆಯಾದ ಬೈನರಿ ವ್ಯವಸ್ಥೆಯನ್ನು ಮಕ್ಕಳಿಗೆ ಪರಿಚಯಿಸುವ 'ಒಂದು-ಸೊನ್ನೆಯ ಕತೆ'ಯ ಪ್ರತಿಗಳು ಈಗಷ್ಟೇ ನನ್ನ ಕೈಸೇರಿವೆ.


ಈ ಖುಷಿಯನ್ನು ನಿಮ್ಮೊಡನೆ ಹಂಚಿಕೊಳ್ಳುವುದಷ್ಟೇ ಈ ಬರಹದ ಉದ್ದೇಶವಲ್ಲ. ಇನ್ನೂ ಒಂದು ಇಂಟರೆಸ್ಟಿಂಗ್ ವಿಷಯ ಇದೆ.

ಆ ವಿಷಯ ಏನೆಂದರೆ ಹೊಸ ಕತೆಗಳನ್ನು ಬರೆಯುವ ಆಸಕ್ತಿಯುಳ್ಳವರಿಗೆ ಸ್ಟೋರಿವೀವರಿನಲ್ಲಿ ಈಗ ಒಂದು ಸ್ಪರ್ಧೆ ನಡೆಯುತ್ತಿದೆ. 'Retell, Remix & Rejoice' ಎಂಬ ಹೆಸರಿನ ಈ ಸ್ಪರ್ಧೆಗೆ ನೀವು ಬರೆದ ಕತೆಗಳನ್ನು ಕಳಿಸುವ ಮೂಲಕ ನೀವು ಆಕರ್ಷಕ ಬಹುಮಾನಗಳನ್ನು ಗೆಲ್ಲಬಹುದು, ನಿಮ್ಮ ಕತೆಯನ್ನು ಪ್ರಕಟಿಸುವ ಅವಕಾಶವನ್ನೂ ಪಡೆಯಬಹುದು!

ಪ್ರಥಮ್ ಬುಕ್ಸ್ ಹೇಳುವಂತೆ ಈ ಅಭಿಯಾನದ ಮುಖ್ಯ ಉದ್ದೇಶ ಕನ್ನಡ, ಹಿಂದಿ, ಬಂಗಾಳಿ, ಮರಾಠಿ, ತಮಿಳು, ಉರ್ದು ಮುಂತಾದ ಭಾಷೆಗಳಲ್ಲಿ ಹೊಚ್ಚ ಹೊಸ ಕತೆಗಳನ್ನು ಬರೆಸುವುದು ಮತ್ತು ಈ ಭಾಷೆಗಳ ಕತೆಗಳಿಗೆ ಓದುಗರನ್ನು ಹೆಚ್ಚಿಸುವುದು. ಈ ಮೂಲಕ ಭಾರತದ ಪ್ರಾದೇಶಿಕ ಭಾಷೆಗಳಲ್ಲಿ ಉದಯೋನ್ಮುಖ ಬರಹಗಾರರನ್ನು ಗುರುತಿಸಿ, ಅವರಿಗೆ ವೇದಿಕೆ ಒದಗಿಸುವುದು ಇದರ ಉದ್ದೇಶ. ಸರಳ, ಓದಲು ಸುಲಭವಾದ ಕತೆಗಳನ್ನು ಬರೆದು, ಸ್ಟೋರಿವೀವರ್ ವೇದಿಕೆಯಲ್ಲಿ ಪ್ರಕಟಿಸುವುದನ್ನು ಈ ಅಭಿಯಾನ ಸಾಧ್ಯವಾಗಿಸುತ್ತದೆ.

ಕತೆಗಳನ್ನು ಬರೆಯುವ ಮುನ್ನ ಸ್ಟೋರಿವೀವರಿನಲ್ಲಿ ಈಗಾಗಲೇ ಇರುವ ಕೆಲ ಕತೆಗಳನ್ನು ಓದಿದರೆ ಒಳ್ಳೆಯದು. ಅಲ್ಲಿರುವ ಲೆವೆಲ್ ೧ ಹಾಗೂ ಲೆವೆಲ್ ೨ ಕತೆಗಳ ಮಟ್ಟದಲ್ಲೇ ನಿಮ್ಮ ಕತೆಗಳೂ ಇರಬೇಕಾದ್ದು ಅಪೇಕ್ಷಣೀಯ. ಸ್ಟೋರಿವೀವರ್‌ನಲ್ಲಿ ಈಗಾಗಲೇ ಇರುವ ಚಿತ್ರಗಳ ಅಗಾಧ ಸಂಗ್ರಹದಿಂದ ನಮ್ಮ ಇಷ್ಟದ ಚಿತ್ರಗಳನ್ನು ಆಯ್ದು ನಮ್ಮ ಕತೆಯ ಜೊತೆ ಬಳಸಿಕೊಳ್ಳಬಹುದು.


ಈ ಕೆಳಗಿನ ವಿಷಯಗಳ ಕುರಿತು ನೀವು ಕತೆಗಳನ್ನು ಬರೆಯಬಹುದು:

• ಕುಟುಂಬ, ಸ್ನೇಹಿತರು ಮತ್ತು ನೆರೆಹೊರೆಯವರನ್ನು ಕುರಿತಾದ ಕತೆಗಳು: ತಂದೆ-ತಾಯಿ, ಸೋದರರು, ಚಿಕ್ಕಪ್ಪ- ಚಿಕ್ಕಮ್ಮಂದಿರು, ಅಜ್ಜ-ಅಜ್ಜಿಯರು... ಕುಟುಂಬ, ಪರಿವಾರದ ಪರಿಕಲ್ಪನೆ, ಗೆಳೆಯರು ಮತ್ತು ಸಮುದಾಯ ಕುರಿತಾದ ಯಾವುದೇ ವಸ್ತು ಕತೆಯಾಗಬಹುದು. 
• ಮುದ ನೀಡುವ ಕತೆಗಳು: ಹಾಸ್ಯದ ಮೂಲಕ ವಿಷಯ ತಿಳಿಸುವ ಯಾವುದಾದರೂ ಕತೆ. 
• ಆಟಗಳನ್ನು ಕುರಿತ ಕತೆ: ಫುಟ್ ಬಾಲ್, ಕ್ರಿಕೆಟ್, ಗಿಲ್ಲಿ-ದಾಂಡು, ಕೂಡಿ ಆಡುವ ಯಾವುದೇ ಆಟ, ಸಮುದಾಯ ಕುರಿತ ಕತೆಗಳು. ಕ್ರೀಡಾ ಸಾಧಕರ ಸ್ಫೂರ್ತಿದಾಯಕ ಕತೆಗಳು.
• ಶಾಲಾ ಕತೆಗಳು: ಶಾಲಾ ದಿನಗಳು, ಗೆಳೆತನ, ವಿದ್ಯಾರ್ಥಿಗಳು ಮತ್ತು ಶಿಕ್ಷಕರು, ಶಾಲಾದಿನಗಳ ಮಧುರ ಮೆಲುಕುಗಳು, ಅಷ್ಟೇ ಏಕೆ ಊಟದ ಸಮಯ ಇತ್ಯಾದಿ. ವಿಷಯಗಳಿರುವ ಕತೆಗಳು.   

ಈ ಸ್ಪರ್ಧೆಯ ಕುರಿತು ಹೆಚ್ಚಿನ ಮಾಹಿತಿ ಪಡೆಯಲು, ಸ್ಪರ್ಧೆಯಲ್ಲಿ ಭಾಗವಹಿಸಲು ಕ್ಲಿಕ್ ಮಾಡಿ: https://storyweaver.org.in/v0/blog_posts/380

ತ್ವರೆಮಾಡಿ, ಈ ಅಭಿಯಾನ ಏಪ್ರಿಲ್ ೨೦, ೨೦೧೯ರಂದು ಕೊನೆಗೊಳ್ಳುತ್ತಿದೆ!

ಕೆಂಪು ಬಣ್ಣದ ಚೆಡ್ಡಿ, ಹಳದಿ ಬೂಟು, ಬಿಳಿಯ ಕೈಚೀಲ, ದೊಡ್ಡ ಕಿವಿ, ಉದ್ದನೆಯ ಬಾಲ - ಇಷ್ಟು ಹೇಳುತ್ತಿದ್ದಂತೆಯೇ ಮುದ್ದು ಇಲಿ ಮಿಕಿಮೌಸ್ ಚಿತ್ರ ನಮ್ಮ ಕಣ್ಣಮುಂದೆ ನಿಲ್ಲುತ್ತದೆ. ಮಿಕಿಯ ಚೇಷ್ಟೆಗಳನ್ನೆಲ್ಲ ನೆನಪಿಸಿಕೊಂಡವರ ತುಟಿಯಂಚಿನಲ್ಲೊಂದು ಸುಳಿನಗೆಯೂ ಮೂಡುತ್ತದೆ. ಅಮೆರಿಕಾದ ಮಾಜಿ ಅಧ್ಯಕ್ಷ ಜಿಮ್ಮಿ ಕಾರ್ಟರ್ ಒಮ್ಮೆ ಹೇಳಿದಂತೆ "ಭಾಷೆ - ಸಂಸ್ಕೃತಿಗಳ ಮಿತಿಗಳನ್ನೆಲ್ಲ ಮೀರಿ ನಿಲ್ಲುವ ಮಿಕಿ, ಸದ್ಭಾವನೆಯ ಪ್ರತೀಕ. ಮಿಕಿಯನ್ನು ನೋಡುವುದೆಂದರೆ ಅದು ಸಂತೋಷವನ್ನೇ ನೋಡಿದಂತೆ!"

ನಿಜ, ಮಿಕಿಮೌಸ್ ಎಂಬ ಪುಟಾಣಿ ಮಾಂತ್ರಿಕ ನಮ್ಮ ಮೇಲೆ ಮಾಡಿರುವ ಮೋಡಿಯೇ ಅಂಥದ್ದು. ಎರಡು ವರ್ಷದ ಮೈತ್ರಿಯಿಂದ ಹಿಡಿದು ಅವರ ತಾತನವರೆಗೆ ಎಲ್ಲರಿಗೂ ಮಿಕಿಮೌಸ್ ಅಚ್ಚುಮೆಚ್ಚು.

ಹೀಗೊಂದು ದಿನ ಮನೆಯಲ್ಲಿ ಎಲ್ಲರೂ ಕುಳಿತು ಟೀವಿ ನೋಡುತ್ತಿದ್ದಾಗ ಯಥಾಪ್ರಕಾರ ಯಾವ ಚಾನೆಲ್ ನೋಡಬೇಕು ಎನ್ನುವ ವಿಷಯದ ಕುರಿತು ಸಣ್ಣದೊಂದು ಚರ್ಚೆ ಶುರುವಾಯಿತು. ಕನ್ನಡ ಸಿನಿಮಾ, ಹಿಂದಿ ಸೀರಿಯಲ್ಲು, ಕ್ರಿಕೆಟ್ ಮ್ಯಾಚು ಎಂದೆಲ್ಲ ವಾದ ನಡೆಯುವಾಗ "ಕಾರ್ಟೂನು!" ಎಂದು ಮಕ್ಕಳ ಡಿಮ್ಯಾಂಡು ಶುರುವಾಯಿತು. ಚೆನ್ನಾಗಿರುವ ಕಾರ್ಟೂನು ಯಾವುದೂ ಬರುತ್ತಿಲ್ಲ ಎಂದು ನಂಬಿಸುವ ಪ್ರಯತ್ನದಲ್ಲಿ ಒಂದೆರಡು ಚಾನೆಲ್ ಬದಲಿಸುವಷ್ಟರಲ್ಲಿ ಒಂದು ಕಡೆ ಮಿಕಿಮೌಸ್ ಕಂಡುಬಿಡುವುದೇ? ಸರಿ, ವಾದವಿವಾದಗಳೆಲ್ಲ ತಣ್ಣಗಾಗಿ ಎಲ್ಲರೂ ಮಿಕಿಮೌಸ್ ನೋಡುವುದರಲ್ಲಿ ಮಗ್ನರಾದರು.
ಕೆಲಹೊತ್ತಿನ ನಂತರ ಆ ಕಾರ್ಯಕ್ರಮ ಮುಗಿದು ಬೇರೆಯದೇನೋ ಶುರುವಾದರೂ ಎಲ್ಲರೂ ಮಿಕಿಮೌಸ್ ಗುಂಗಿನಲ್ಲೇ ಇದ್ದರು ಅನ್ನಿಸುತ್ತದೆ. ಸುಹಾಸನ ಕಡೆಯಿಂದ ಪ್ರಶ್ನೆ ಬಂತು: "ಮಿಕಿಮೌಸ್ ಕಾರ್ಟೂನುಗಳು ಇಷ್ಟೆಲ್ಲ ಚೆನ್ನಾಗಿರುತ್ತವಲ್ಲ, ಇದನ್ನು ರೂಪಿಸಿದ್ದು ಯಾರು?"

ಮೈತ್ರಿಯ ತಾತ ಅಲ್ಲೇ ಇದ್ದರಲ್ಲ, ಅವರು ಹೇಳಿದರು, "ಮಿಕಿ ಮೌಸ್ ಪಾತ್ರ ಸೃಷ್ಟಿಸಿದ್ದು ಖ್ಯಾತ ಕಾರ್ಟೂನ್ ರಚನೆಕಾರ ವಾಲ್ಟ್ ಡಿಸ್ನಿ. ಕಾರ್ಟೂನ್ ಚಿತ್ರಗಳಲ್ಲಿ ಮಿಕಿಮೌಸ್ ಮೊದಲಿಗೆ ಕಾಣಿಸಿಕೊಂಡದ್ದು ೧೯೨೮ರಲ್ಲಿ"

ಸುಹಾಸನಿಗೆ ಆಶ್ಚರ್ಯ, "ಮಿಕಿಮೌಸ್ ಹುಟ್ಟಿ ಅಷ್ಟೊಂದು ವರ್ಷ ಆಗಿದೆಯಾ?"

ತಾತ ಹೇಳಿದರು, "ಹೌದು, ಮಿಕಿ ಮೊದಲಸಲ ಕಾಣಿಸಿಕೊಂಡಿದ್ದು ೧೯೨೮ರ ನವೆಂಬರ್‌ನಲ್ಲಿ ತೆರೆಕಂಡ ಸ್ಟೀಮ್‌ಬೋಟ್ ವಿಲ್ಲಿ ಎನ್ನುವ ಕಾರ್ಟೂನ್ ಚಿತ್ರದಲ್ಲಿ. ಈ ಚಿತ್ರಕ್ಕೂ ಮೊದಲು ಪ್ಲೇನ್ ಕ್ರೇಜಿ ಹಾಗೂ ದ ಗ್ಯಾಲಪಿನ್' ಗೌಚೋ ಎನ್ನುವ ಎರಡು ಚಿತ್ರಗಳಲ್ಲಿ ಮಿಕಿ ಕಾಣಿಸಿಕೊಂಡಿತ್ತಾದರೂ ಅವು ಸಾರ್ವಜನಿಕವಾಗಿ ಬಿಡುಗಡೆಯಾಗಿರಲಿಲ್ಲ"

ಸುಹಾಸನ ಜೊತೆಗೆ ಆದಿತ್ಯನೂ ಅಲ್ಲೇ ಇದ್ದನಲ್ಲ. ಅವನು ಸುಹಾಸನ ತಮ್ಮನಾದರೂ ಪ್ರಶ್ನೆ ಕೇಳುವುದರಲ್ಲಿ ಅಣ್ಣನನ್ನೂ ಮೀರಿಸಿದವನಲ್ಲವೇ, ಕೇಳಿಯೇಬಿಟ್ಟ, "ತಾತ, ಕಾರ್ಟೂನಿನಲ್ಲಿ ಇಲಿಯನ್ನೇ ಉಪಯೋಗಿಸಬೇಕು ಅಂತ ಡಿಸ್ನಿಗೆ ಐಡಿಯಾ ಹೇಗೆ ಬಂತು?"

"ಹೇಗೂ ಇಂಟರ್‌ನೆಟ್ ಬಳಸಲು ಕಲಿತಿದ್ದೀಯಲ್ಲ, ಮಿಕಿಮೌಸ್ ಕತೆ ನೀನೇ ಹುಡುಕಿಕೊಂಡು ಓದು ನೋಡೋಣ. ಆಮೇಲೆ ನಮಗೂ ಹೇಳುವೆಯಂತೆ," ತಾತ ಹೇಳಿದರು.

ಸರಿ, ಸುಹಾಸ - ಆದಿತ್ಯ ಇಬ್ಬರೂ ಟ್ಯಾಬ್ಲೆಟ್ ತೆರೆದು ಮಿಕಿ ಬಗ್ಗೆ ಮಾಹಿತಿ ಹುಡುಕಲು ಶುರುಮಾಡಿದರು. ಒಂದುಕಡೆ ಸಿಕ್ಕ ಮಾಹಿತಿ ಹೀಗಿತ್ತು:

ಮಿಕಿಮೌಸ್‌ಗಿಂತ ಮೊದಲು ವಾಲ್ಟ್ ಡಿಸ್ನಿ 'ಓಸ್ವಾಲ್ಡ್ ದಿ ಲಕಿ ರ್‍ಯಾಬಿಟ್' ಎನ್ನುವ ಕಾರ್ಟೂನ್ ಪಾತ್ರವನ್ನು ಸೃಷ್ಟಿಸಿದ್ದ. ಆದರೆ ಯಾವುದೋ ಮನಸ್ತಾಪದ ಹಿನ್ನೆಲೆಯಲ್ಲಿ ಆ ಕಾರ್ಟೂನ್ ಸರಣಿಯ ನಿರ್ಮಾಪಕರು ಅದರ ಹಕ್ಕುಗಳನ್ನೆಲ್ಲ ಡಿಸ್ನಿಯಿಂದ ಹಿಂದಕ್ಕೆ ಪಡೆದುಕೊಂಡುಬಿಟ್ಟರು. ಓಸ್ವಾಲ್ಡ್ ಬದಲಿಗೆ ಯಾವ ಪಾತ್ರವನ್ನು ಸೃಷ್ಟಿಸಬಹುದು ಎಂದು ಯೋಚಿಸುತ್ತಿದ್ದ ಡಿಸ್ನಿ ಕುದುರೆ, ಹಸು ಮುಂತಾದ ಹಲವು ಪ್ರಾಣಿಗಳ ಯೋಚನೆ ಬಂದರೂ ಅವು ಯಾವುವೂ ಅವನಿಗೆ ಪೂರ್ತಿ ಸಮಾಧಾನ ತಂದುಕೊಡಲಿಲ್ಲ (ಹೀಗೆ ರೂಪುಗೊಂಡಿದ್ದ ಹಸುವಿನ ಪಾತ್ರ ಕ್ಲಾರಾಬೆಲ್ ಕೌ ಎಂದು, ಕುದುರೆಯ ಪಾತ್ರ ಹೊರೇಸ್ ಹಾರ್ಸ್‌ಕಾಲರ್ ಎಂದು ಮುಂದಿನ ಕಾರ್ಟೂನುಗಳಲ್ಲಿ ಕಾಣಿಸಿಕೊಂಡವು). ಕೊನೆಗೊಂದು ದಿನ ಪುಟಾಣಿ ಇಲಿಯನ್ನು ಸೃಷ್ಟಿಸಿದರೆ ಹೇಗೆ ಎಂದು ಯೋಚಿಸಿದಾಗ ರೂಪುಗೊಂಡದ್ದೇ ಮಿಕಿ.  

ಮಿಕಿ ರೂಪುಗೊಂಡಾಗ ಅದಕ್ಕೆ 'ಮಾರ್ಟಿಮರ್ ಮೌಸ್' ಎಂದು ಹೆಸರಿಡಬೇಕೆಂದು ಡಿಸ್ನಿ ಬಯಸಿದ್ದ. ಆದರೆ ಆ ಹೆಸರು ಆತನ ಪತ್ನಿಗೆ ಇಷ್ಟವಾಗಲಿಲ್ಲ. ಆಕೆ 'ಮಾರ್ಟಿಮರ್' ಬದಲಿಗೆ 'ಮಿಕಿ' ಎನ್ನುವ ಹೆಸರೇ ಚೆನ್ನಾಗಿರುತ್ತದೆ ಎಂದು ಹೇಳಿದಮೇಲೆ ಡಿಸ್ನಿ ಆ ಹೆಸರನ್ನೇ ಅಂತಿಮಗೊಳಿಸಿದ.

ಮಿಕಿಯ ಕಾರ್ಟೂನುಗಳನ್ನು ರೂಪಿಸುವಲ್ಲಿ ಡಿಸ್ನಿಯ ಜೊತೆಗಿದ್ದದ್ದು ಉಬ್ ಇವರ್ಕ್ಸ್. ಮೂಕಿ ಚಿತ್ರಗಳ ಕಾಲ ಹೋಗಿ ಚಲನಚಿತ್ರಗಳಿಗೆ ಧ್ವನಿಯೂ ಸೇರಿಕೊಂಡಾಗ ಕೆಲಸಮಯ ಸ್ವತಃ ಡಿಸ್ನಿಯೇ ಮಿಕಿಯ ಧ್ವನಿಯಾಗಿದ್ದದ್ದುಂಟು. ನಂತರದ ದಿನಗಳಲ್ಲಿ ಈ ಜವಾಬ್ದಾರಿ ಜಿಮ್ಮಿ ಮೆಕ್‌ಡೊನಾಲ್ಡ್, ವೇಯ್ನ್ ಆಲ್‌ಬ್ರೈಟ್ ಹಾಗೂ ಬ್ರೆಟ್ ಇವಾನ್‌ರ ಪಾಲಿಗೆ ಬಂತು.

ಮಿಕಿಯ ಜನಪ್ರಿಯತೆ ಹೆಚ್ಚಿದಂತೆ ಕಾರ್ಟೂನ್ ಚಿತ್ರಗಳಲ್ಲಿ ಆತನ ಜತೆಗಾರರಾಗಿ ಡೊನಾಲ್ಡ್ ಡಕ್, ಗೂಫಿ ಮುಂತಾದ ಪಾತ್ರಗಳೂ ಹುಟ್ಟಿಕೊಂಡವು. ಹಾಗೆಯೇ ಮಿಕಿಯ ಗೆಳತಿಯಾಗಿ ಮಿನ್ನಿಮೌಸ್, ಕುಟುಂಬದ ಸದಸ್ಯರಾಗಿ ಮಾರ್ಟಿ ಹಾಗೂ ಫೆರ್ಡಿ ಮತ್ತು ನೆಚ್ಚಿನ ನಾಯಿಯಾಗಿ ಪ್ಲೂಟೋ ಕೂಡ ಸೇರ್ಪಡೆಯಾದವು. 

ಮಿಕಿ ಕಾರ್ಟೂನುಗಳು ಪತ್ರಿಕೆಗಳಲ್ಲೂ ಕಾಣಿಸಿಕೊಳ್ಳಲು ಶುರುವಾದದ್ದು ೧೯೩೦ರಲ್ಲಿ. ಅದೇ ವರ್ಷ ಮಿಕಿಯ ಮೊದಲ ಕಾಮಿಕ್ ಪುಸ್ತಕ 'ಲಾಸ್ಟ್ ಆನ್ ಎ ಡೆಸರ್ಟ್ ಐಲೆಂಡ್' ಕೂಡ ಪ್ರಕಟವಾಯಿತು. ಮಿಕಿ ಪಾತ್ರವಿದ್ದ ಟೀವಿ ಕಾರ್ಯಕ್ರಮಗಳೂ ಪ್ರಾರಂಭವಾದವು. ಮಿಕಿ ಆಟಿಕೆಗಳು, ವೀಡಿಯೋ ಗೇಮ್‌ಗಳು, ಗಡಿಯಾರಗಳೂ ಬಂದವು. ವಿವಿಧೆಡೆಗಳಲ್ಲಿ ಡಿಸ್ನಿಲ್ಯಾಂಡ್ ಪ್ರಾರಂಭವಾದಾಗ, ಸಹಜವಾಗಿಯೇ, ಮಿಕಿಗೆ ಪ್ರಮುಖ ಸ್ಥಾನ ದೊರಕಿತು.


ಇಷ್ಟೆಲ್ಲ ಜನಪ್ರಿಯತೆಯಿಂದಾಗಿ ವಾಲ್ಟ್ ಡಿಸ್ನಿಯ ಸಂಸ್ಥೆಯನ್ನು ಜನ ಮುಖ್ಯವಾಗಿ ಮಿಕಿಮೌಸ್‌ನಿಂದಲೇ ಗುರುತಿಸಲು ಪ್ರಾರಂಭಿಸಿದರು. ಹಾಗಾಗಿ ಡಿಸ್ನಿ ಸಂಸ್ಥೆ ಹಲವು ಸಂದರ್ಭಗಳಲ್ಲಿ (ಉದಾ: ಡಿಸ್ನಿ ಚಾನೆಲ್) ಮಿಕಿಯ ಮುಖದ ಆಕಾರವನ್ನೇ ತನ್ನ ಲಾಂಛನವಾಗಿ ಬಳಸಿತು.

ಮಿಕಿಗೆ ದೊರೆತ ಪ್ರಶಸ್ತಿಗಳೂ ಅನೇಕ. ಮಿಕಿ ಮೌಸ್‌ನಂತಹ ಅಪೂರ್ವ ಪಾತ್ರವನ್ನು ಸೃಷ್ಟಿಸಿದ್ದಕ್ಕಾಗಿ ೧೯೩೨ರಲ್ಲಿ ವಾಲ್ಟ್ ಡಿಸ್ನಿಗೆ ವಿಶೇಷ ಆಸ್ಕರ್ ಪ್ರಶಸ್ತಿ ಕೂಡ ದೊರಕಿತು.

ಇಷ್ಟು ಓದುವಷ್ಟರಲ್ಲಿ ತಾತ "ಇನ್ನೊಂದು ಚಾನಲ್ಲಿನಲ್ಲಿ ಡೊನಾಲ್ಡ್ ಡಕ್ ಕಾರ್ಟೂನು ಬರುತ್ತಿದೆ ನೋಡ್ತೀರಾ" ಅಂತ ಕೇಳಿದರು. ಅಷ್ಟು ಕೇಳಿಸಿದ್ದೇ ತಡ, ಆದಿತ್ಯ ಸುಹಾಸನನ್ನೂ ಕರೆದುಕೊಂಡು ಟೀವಿಯ ಕಡೆಗೆ ಓಡಿದ!

(ವಿಜಯವಾಣಿ ಪತ್ರಿಕೆಗಾಗಿ ೨೦೧೪ರಲ್ಲಿ ಬರೆದಿದ್ದು)

ಬಹಳ ಹಿಂದಿನಿಂದಲೂ ಮೈಸೂರು ಅಪ್ರತಿಮ ಪ್ರಕಾಶನ ಸಂಸ್ಥೆಗಳ ತವರು. ಎಲ್ಲ ಬಗೆಯ ಓದುಗರಿಗೂ ಮೆಚ್ಚುಗೆಯಾಗುವಂತಹ ಕೃತಿಗಳು ಈ ಸಂಸ್ಥೆಗಳಿಂದ ಹೊರಬರುತ್ತಿದ್ದವು ಎನ್ನುವುದಕ್ಕೆ ನಾವು ಚಿಕ್ಕಂದಿನಲ್ಲಿ ಓದುತ್ತಿದ್ದ ಮಕ್ಕಳ ಪುಸ್ತಕಗಳೇ ಸಾಕ್ಷಿ. ಎಂ. ಎಸ್. ರಾಮರಾವ್, ಭಾರತೀಸುತ, ಎಸ್. ಅನಂತನಾರಾಯಣ, ನಾ. ಕಸ್ತೂರಿ ಮುಂತಾದ ಹಿರಿಯ ಲೇಖಕರು ಬರೆದ ಈ ಪುಟ್ಟ ಪುಸ್ತಕಗಳು ಸಾಲುಸಾಲಾಗಿ ನಮ್ಮ ಓದಿನ ಹಸಿವನ್ನು ತಣಿಸುತ್ತಿದ್ದವು.

ಇಂತಹ ಪುಸ್ತಕಗಳ ಪೈಕಿ ಥಟ್ಟನೆ ನೆನಪಾಗುವ ಹೆಸರು ಎಂ. ಎಸ್. ರಾಮರಾಯರು ಬರೆದ, ಡಿ. ವಿ. ಕೆ. ಮೂರ್ತಿಯವರು ಪ್ರಕಟಿಸಿದ 'ನಡಿ ಕುಂಬಳವೇ ಟರ್‍ರಾ ಪುರ್‍ರಾ'! ಜಾಣ ಅಜ್ಜಿಯೊಬ್ಬಳು ತನ್ನನ್ನು ತಿನ್ನಬಯಸುವ ಕಾಡುಪ್ರಾಣಿಗಳಿಗೆ ತನ್ನ ಸಮಯಪ್ರಜ್ಞೆಯಿಂದ ಚಳ್ಳೆಹಣ್ಣು ತಿನ್ನಿಸುವ ಈ ಕತೆ ನಮ್ಮನ್ನು ಬಿದ್ದೂಬಿದ್ದೂ ನಗುವಂತೆ ಮಾಡುತ್ತಿತ್ತು.

ಸುಮಾರು ಐವತ್ತು ವರ್ಷಗಳ ಹಿಂದೆ ಮುದ್ರಣವಾಗಿರಬಹುದಾದ ಈ ಕೃತಿ 2011ರಲ್ಲಿ ಪ್ರಕಟವಾದ ಸಂಕಲನವೊಂದರ ಭಾಗವಾಗಿ ಮತ್ತೆ ಬೆಳಕು ಕಂಡಿತ್ತು ಎನ್ನುವುದು ಇವತ್ತು ನವಕರ್ನಾಟಕ ಪುಸ್ತಕ ಪ್ರದರ್ಶನಕ್ಕೆ ಹೋದಾಗ ಗೊತ್ತಾಯಿತು. ತಕ್ಷಣ ಕೊಂಡುತಂದು ಓದಿದ ಪುಸ್ತಕ ಹಿಂದಿನಷ್ಟೇ ಖುಷಿ ಕೊಟ್ಟಿತು, ಹಿಂದಿನದೆಲ್ಲವನ್ನೂ ನೆನಪಿಸಿತು.

ಇದರ ಜೊತೆ ಕೈಗೆ ಸಿಕ್ಕಿದ ಇನ್ನಷ್ಟು ಹಳೆಯ ಪುಸ್ತಕಗಳನ್ನು, ಅದರೊಳಗಿನ ಹಳೆಯ ಕತೆಗಳನ್ನು ಇನ್ನಷ್ಟೇ ಓದಬೇಕು. ಜಗಜೆಟ್ಟಿ ಜವರಣ್ಣನನ್ನೂ ಕೊಳಲನು ಊದಿದ ಸಂತೋಷಿಯನ್ನೂ ಮತ್ತೆ ನೆನಪಿಸಿಕೊಳ್ಳಬೇಕು. ಅರೆಬರೆ ಮರೆತಂತಾಗಿರುವ ಇನ್ನು ಕೆಲ ಪುಸ್ತಕಗಳೂ ಕೈಗೆ ಸಿಗುವಂತಾಗಲಿ ಎಂದು ಹಾರೈಸಿಕೊಳ್ಳಬೇಕು.

ಅಂದಹಾಗೆ ರೈಲುಸವಾರಿ ಮಾಡಿದ ಪೆದ್ದಚೆನ್ನ ನಿಮ್ಮಲ್ಲಿ ಎಷ್ಟು ಜನಕ್ಕೆ ಗೊತ್ತು? ☺

ಪರಿಸರಪ್ರೇಮಿ ಎನ್ನಿ, ವಿಜ್ಞಾನ ಲೇಖಕರೆನ್ನಿ, ಪತ್ರಕರ್ತರೆನ್ನಿ, ತಂತ್ರಜ್ಞಾನ ಆಸಕ್ತರೆನ್ನಿ, ಕಿರಿಯ ಬರಹಗಾರರ ಗುರುಗಳೆನ್ನಿ - ಎಲ್ಲ ವಿಶೇಷಣಗಳೂ ನಾಗೇಶ ಹೆಗಡೆಯವರಿಗೆ ಹೊಂದುತ್ತವೆ. ಛಾಯಾಗ್ರಾಹಕರು, ಕೃಷಿಕರು, ಚಿತ್ರಕಾರರು, ಹಾಸ್ಯ ಬರಹಗಾರರು ಎನ್ನುವಂತಹ ಇನ್ನೂ ಹಲವಾರು ಸಫಿಕ್ಸುಗಳನ್ನೂ ನಾವು ಅವರಿಗೆ ಫಿಕ್ಸ್ ಮಾಡಬಹುದು.

ಹೀಗಾಗಿಯೇ ನಾಗೇಶ ಹೆಗಡೆಯವರೊಡನೆ ಮಾತನಾಡುವುದೆಂದರೆ ಅದೊಂದು ವಿಶಿಷ್ಟ ಅನುಭವ. ಅಂತಹುದೊಂದು ಅನುಭವ ತಪ್ಪಿಸಿಕೊಳ್ಳಬಾರದು ಎಂದಿದ್ದರೆ ನಾಳೆ ಶನಿವಾರ (ಏಪ್ರಿಲ್ ೨೨, ೨೦೧೭) ಬೆಂಗಳೂರಿನ ಕನ್ನಡ ಭವನ ಆವರಣದಲ್ಲಿರುವ ನಯನ ಸಭಾಂಗಣಕ್ಕೆ ಬನ್ನಿ. ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಆಯೋಜಿಸುವ 'ಮನೆಯಂಗಳದಲ್ಲಿ ಮಾತುಕತೆ' ಕಾರ್ಯಕ್ರಮದ ಈ ತಿಂಗಳ ಅತಿಥಿಯಾಗಿ ನಾಗೇಶ ಹೆಗಡೆ ಅಲ್ಲಿರುತ್ತಾರೆ, ನಮ್ಮೊಡನೆ ಮಾತನಾಡುತ್ತಾರೆ.

ಶನಿವಾರ ಸಂಜೆಯ ಈ ಮಾತುಕತೆಯನ್ನು ಮತ್ತಷ್ಟು ಸ್ಮರಣೀಯವಾಗಿಸುವ ಇನ್ನೊಂದು ಕಾರ್ಯಕ್ರಮವೂ ಇದೆ. ಅದು ನಾಗೇಶ ಹೆಗಡೆಯವರ ಹೊಚ್ಚಹೊಸ ಕೃತಿ 'ಭೂಮಿಯೆಂಬ ಗಗನನೌಕೆ'ಯ ಬಿಡುಗಡೆ. ಹೆಸರಾಂತ ಕತೆಗಾರ ವಸುಧೇಂದ್ರ ಈ ಪುಸ್ತಕವನ್ನು ಬಿಡುಗಡೆ ಮಾಡುತ್ತಾರೆ, ಅದರ ಕುರಿತು ಮಾತನಾಡುತ್ತಾರೆ ಎನ್ನುವುದು ಇನ್ನೊಂದು ವಿಶೇಷ.

ಪರಿಸರ ಪ್ರೇಮಿ ನಾಗೇಶ ಹೆಗಡೆಯವರಿಗೂ 'ಭೂಮಿ'ಗೂ ಬಹಳ ಹತ್ತಿರದ ನಂಟು. ಪರಿಸರ-ವಿಜ್ಞಾನ ಕುರಿತು ಕನ್ನಡದಲ್ಲಿ ಹೀಗೂ ಬರೆಯಬಹುದು ಎಂದು ತೋರಿಸಿಕೊಟ್ಟ ಅವರ ಜನಪ್ರಿಯ ಕೃತಿ 'ಇರುವುದೊಂದೇ ಭೂಮಿ'. ಈಗ ಅವರ ಪುಸ್ತಕಗಳನ್ನು ಪ್ರಕಟಿಸುವ ಪ್ರಕಾಶನ ಸಂಸ್ಥೆಯ ಹೆಸರೂ ಭೂಮಿ.

ನಾಳೆ ಬಿಡುಗಡೆಯಾಗುತ್ತಿರುವ ಪುಸ್ತಕವೂ ಭೂಮಿಯನ್ನು ಕುರಿತದ್ದೇ. ಅದರಲ್ಲಿ ಪ್ರಸ್ತಾಪವಾಗಿರುವ ವಿಷಯ ಎಷ್ಟು ಮಹತ್ವದ್ದೆಂದು ತಿಳಿಯಲು ಈ ಕೆಲವೇ ಸಾಲುಗಳನ್ನು ಓದಿದರೆ ಸಾಕು: "ಬಾಹ್ಯಾಕಾಶದಲ್ಲಿ ವರ್ಷಗಟ್ಟಲೆ ಸತತವಾಗಿ ಚಲಿಸಬೇಕಾದ ಗಗನನೌಕೆಯಲ್ಲಿ ನೀರು, ಗಾಳಿ, ಆಹಾರ ದ್ರವ್ಯ ಎಲ್ಲವೂ ಸೀಮಿತ ಪ್ರಮಾಣದಲ್ಲೇ ಇರುತ್ತದೆ. ಅದು ಮುಗಿದುಹೋದರೆ ಹೊರಗಿನಿಂದ ತರುವಂತಿಲ್ಲ. ಈ ನಮ್ಮ ಭೂಮಿಯೂ ಗಗನನೌಕೆಯ ಹಾಗೇ. ಇಲ್ಲೂ ನೀರು, ಖನಿಜ, ಇಂಧನ - ಯಾವುದು ಮುಗಿದರೂ ಹೊರಗಿನಿಂದ ತರುವಂತಿಲ್ಲ..."

ನಾಗೇಶ ಹೆಗಡೆಯವರ ಮಾತುಗಳಲ್ಲೇ ಹೇಳುವುದಾದರೆ "ತುಣುಕು ಭೂಮಿಗಾಗಿ ಬಡಿದಾಡುವ ಕೋಟ್ಯಂತರ ಜನರ ನಡುವೆ, ಇಡಿಯಾಗಿ ಯಾರಿಗೂ ಬೇಡವಾದ ಅನಾಥ ಗ್ರಹದ" ಇಂದಿನ ಪರಿಸ್ಥಿತಿಯ ಚಿತ್ರಣ ಈ ಪುಸ್ತಕದಲ್ಲಿದೆ. ಗಮನಿಸಿ, ೧೮೦ ರೂಪಾಯಿ ಮುಖಬೆಲೆಯ ಈ ಕೃತಿ ನಾಳೆ ರೂ. ೧೫೦ಕ್ಕೆ ನಮ್ಮ ಕೈಸೇರಲಿದೆ.

ತಪ್ಪದೇ ಬನ್ನಿ, ಶನಿವಾರ ಭೇಟಿಯಾಗೋಣ; ನಾಗೇಶ ಹೆಗಡೆಯವರೊಡನೆ ಮಾತನಾಡೋಣ, ಹೊಸ ವಿಷಯಗಳನ್ನು ತಿಳಿದುಕೊಳ್ಳೋಣ!

ಕಾರ್ಯಕ್ರಮ: ಏಪ್ರಿಲ್ ೨೨, ೨೦೧೭ರ ಶನಿವಾರ ಸಂಜೆ ೪ ಗಂಟೆಗೆ
ಸ್ಥಳ: ನಯನ ಸಭಾಂಗಣ, ಕನ್ನಡ ಭವನ, ಜೆಸಿ ರಸ್ತೆ, ಬೆಂಗಳೂರು